“သူပုန်" ဆိုရေ နာမည်နန့် စာအုပ်တစ်အုပ်ထွက်အောင်လုပ်နီစွာ အင်တန်ချေ ကြာပါရာ။ တပ်တော်အတွင်း မှာဟိရေ,စာပီဝါသနာရှင်တိကို "ပင်တိုင်"ထားပနာ လုပ်နီကတ်စွာ။ တိုက်ပွဲနန့်ကိုဗစ်က သူပုန့်ရည်မှန်းချက်ကိုသုံးထစ်လောက်ထစ်ပလိုက်ရေအတွက် စာအုပ်ထွက်ဖို့စွာ သုံး၊လေးလလောက်နောက်ကျလားခရေ။ အစခါ(၁၂) နှစ်မြောက်တပ်တော်နိမှာ ထွက်နိုင်အောင် ကြိုးစားခကေလေ့ အကြောင်း(၃/၄) ချက်ကြောင့်သတ်မှတ်လျာထားရေရက်မှာမထွက်နိုင်ခပါရာ။ အေနှစ်အတွင်းထွက်ဖြစ်အောင်တော့ လုပ်နီပါရေလို့။

စာအုပ်နာမည်ကို"သူပုန်" လို့ပီးထားပနာ ကဗျာ၊ ကာတွန်း၊ ပန်းချီ၊ ကာတွန်း၊ Digital Art , ဆောင်းပါး၊ အက်ဆေး၊ ဝတ္ထုတို-ရှည် အစဟိလို့ ကြိုက်ရေအရီးအသား၊ အားသန်ရေအရီးအသားနန့်"သူပုန်" ကိုရီးသားထုဆစ်ပုံဖော်ထားကတ်တေ။ စာအုပ်ထွက်နောက်ကျလက်စနန့် ကိုယ်ရို့ အမျိုးတိကိုအေနိခါအသိပီးပနာ  အထက်ကပြောထားရေ အနုပညာတစ်ခုခုနန့်"သူပုန်" စာအုပ်မှာဝင်ရီးလို့ပီးပို့နိုင်ပါကြောင်း အသိပီးယင်းဖိတ်ခေါ်လိုက်ပါရေ။ 

စာပီသမား၊ စာပီဝါသနာရှင်တိ၏စာမူတိဖိတ်ခေါ်ပါယင့်။ စာမူစည်းကမ်းကတော့ ရခိုင်မဂ္ဂဇိန်းတိထဲက မူအတိုင်းနီးပါးရာ။ ရီးနီရေလူတိကတော့ သိလီပါဖို့။ 

"သူပုန်" ကဗျာ(၁)(၂)(၃)(၄)(၅)(၆)(၇)(၈)  ( ရွီးချယ်ပြီး) ကဗျာတိကတော့ အားကောင်းရေ။

"သူပုန်" ကာတွန့် (၁)(၂)(၃) ( ရွီးချယ်ပြီး, အေကာတွန့်အပိုင်း စကေလိုပါသိမ့်ရေ)

"သူပုန်" ဆောင်းပါး (၁)(၂)(၃)(၄)(၅) ( ရွီးချယ်ပြီး, စာပီဝါသနာရှင်တိအနီနန့် ရီးသားပီးပို့နိုင်ပါရေ)

"သူပုန်" ဝတ္ထုတို (၁)(၂) (အေအပိုင်းလေ့ အားနည်းပါသိမ့်ရေ။ ပေါက်ပေါက်ချေ ကျရေ ဝတ္ထုတိုတိကို မျှော်လင့်နီပါသိမ့်ရေ)

"သူပုန်" စာအုပ်ထဲက စာမြည်း တချို့ နန့် သရုပ်ဖော်ပုံတချို့ကို မြည်းဖို့ပီးလိုက်ပါရေ။

စာမြည်း(၁)

"သူပုန်ဆိုစွာ တစ်နိုင်တစ်ပိုင်ကနီ အများပိုင်ဖြစ်ဖို့ပြင်နီဗျာယ်ဆိုကေ ယင်းတိုင်းပြည်စွာ သူပုန်တိုင်းပြည်ဖြစ်ဖို့ဦးတည်နီဗျာယ်၊ ပျက်သုဉ်းခြင်းရသပေါက်နီဗျာယ်"

(Dr.ညိုထွန်းအောင်)

စာမြည်း (၂)

"နွီဦးတော်လှန်ရီးမတိုင်ခင်အထိ ကိုယ့်သား၊သမီးတိစွာသူပုန်ဖြစ်လားလီဖို့လို့ထင်ထားရေ ဗမာအမိ၊အဖ တိ မြန်မာပြည်မှာမဟိခ"

(သူပုန်တိုင်းပြည် ဆောင်းပါးမှ ကောက်နှုတ်ချက်)

စာမြည်း(၃)

"လူအရီခွံလဲပနာ သူပုန်အင်္ကျီကိုဝတ်ရရေအခိုက်အတန့်စွာ သူပုန်တစ်ကောင်၏ အလှဆုံးအချိန်ဖြစ်လီဖို့ ကျနော့်အတွိအကြုံနန့်ပြောလိုက်ချင်ရေ"

(သူပုန်ထခြင်း အနုပညာ ဆောင်းပါးမှ ကောက်နှုတ်ချက်)

စာမြည်း(၄)

"သူပုန်တစ်ယောက်၏ပါရမီဖြည့်ဖက်သည် သာမန်လူသားတစ်ယောက်၏ ပါရမီဖြည့်ဖက်ထက် စိတ်ဖိစီးမှု၊ သောကများမှာ လက်လေးဆစ်အပိုတွင်ဟိသည်"

(သူပုန်မယား(၁) ဆောင်းပါးမှ ကောက်နှုတ်ချက်)

စာမြည်း (၅)

ယူနီကုဒ်နန့်ဖတ်ဖတ် ဇော်ဂျီနန့်ဖတ်ဖတ် သူပုန်စွာသူပုန်ဖြစ်နီရဖို့။

(သူပုန် အတွေး 💭)

"သူပုန်" စာအုပ်ကို ထုတ်ရရေ ရည်ရွယ်ချက်တိက 

(၁) သူပုန်မဖြစ်နိုင်သိမ့်ရေ မျိုးဆက်တိအနီနန့် သူပုန်လုပ်ဖို့အတွက် အသင့်ဝမ်းစာဖြစ်နီအောင်။

(၂) "သူပုန်" စာအုပ် ကိုဖတ်ပြီးရေအချိန်မှာ သူပုန်တစ်ယောက်ဖြစ်ဖို့ စိတ်ပိုင်းဆိုင်ရာ အဆင့်သင့်ဖြစ်နီအောင်။

(၃)"သူပုန်" တိထဲမှာ ရခိုင်သူပုန်စွာ မကြာခင်မှာနံပတစ်ဖြစ်နီရဖို့အတွက် အထောက်အကူဖြစ်အောင်။

(၄)စံပြရခိုင်သူပုန်ကနီ သူတော်ကောင်းသူပုန်၊စံပြုရခိုင်သူပုန် ဖြစ်လာအောင်။

(၅) တပ်တော်နန့် ပြည်သူလူထု၏ အနုပညာ ပူးပေါင်းဖန်တီးမှု။

(၆) ပါရမီဖြည့်ဖက် သူပုန်မတိ သူပုန်တိအပေါ် စာနာနားလည်ချစ်တတ်လာအောင်။

ဆိုရေ၊ ဆိုရေ ကောင်းမွန်တဲ့ ရည်ရွယ်ချက်တိနန့် ထုတ်ဖို့ ကြိုးစားအားထုတ်ခြင်းဖြစ်တေ။

arakanidp@163.com 

arakanflagbulletin@yahoo.com သို့ အေနိ ၂၀၂၁ ခုနှစ်၊ ဧပြီလ(၂၅) ရက်ကနီ မေလ(၁၅) ရက်အတွင်းအေ Email ကိုပို့ပီးနိုင်ပါရေ။

ရခိုင်လူမျိုး Dr. ညိုထွန်းအောင်

၂၀၂၁ ခုနှစ်၊ ဧပြီလ(၂၅) ရက်၊ တနင်္ဂနွီနိ။