(စာတော့စကေရှည်လားခပါရေ။ အောင့်အိမ့်လို့ရာဖတ်ပီးကတ်ပါ)

အော်ပရေးယှင်း( Operation) ဆိုရေစကားကို အကြားရဆုံးနယ်ပယ်တိက ဆီးဖက်ဆိုင်ရာနယ်ပယ်၊စစ်တပ်တိနန့်အကြမ်းဖက်တိုက်ဖျက်ရီးဋ္ဌာနတိဖြစ်ရေလို့ထင်မိရေ။ အခြားနယ်ပယ်တိမှာလေ့ သူ့အသုံးနန့်သူ၊ သူ့အဓိပ္ပာယ်နန့်သူဟိလီကတ်ပါဖို့။ WiKipedia မှာ Operation လို့ရိုက်ကြည့်ကေ ကျနော့်ဖုန်းထဲမှာတော့ Operation ဆိုရေ အကြောင်းအရာပြီးကေ Operation Barbarossa ကိုပထမဆုံးတွိရရေ။ (#စကားစပ်- တစ်ခုခုကိုမသိလို့သိချင်ရေဆိုကေ သူများကို အလျင်စလိုမိန်းစွာထက် Wikipedia, WikiSearch ၊ အနီးအနားက Dictionary ၊ Social Media ဖေ့ဘုတ်၊ တွယ်တာ၊ အစဟိစွာတိမှာရှာဖွီတတ်တေအကျင့်လုပ်ကတ်ပါ)

ခန္ဓာကိုယ်ထဲက အစိတ်အပိုင်းတစ်ခုခုကိုဖယ်ထုတ်ရဖို့အတွက်ဖြစ်ဖြစ်၊ ကျိုး-အက်လားခရေအရိုးတိကိုပြန်ဆက်ဖို့အတွက်ဖြစ်ဖြစ်၊ ပိုနီရေအစိတ်အပိုင်းကိုဖယ်ထုတ်ပစ်ရဖို့ဖြစ်ဖြစ် ခွဲစိတ်ဆရာဝန်တိစွာ ယင်းလူနာကို Operation မလုပ်မဖြစ်လုပ်ရရေ။ ရိုးရိုးတန်းတန်းမမွီးနိုင်ရေအချေတိကို LSCS (Lower segment Caesarean section) Operation လုပ်ပနာခွဲမွီးရရေ။ အေချင့်တိက ဆီးပညာနယ်ပယ်က အော်ပရေးယှင်းတိ။ အေဂုလေ့ တိုက်ပွဲတိကြားကဒဏ်ရာရလာရေ စစ်သည်တော်တိထဲက ဇာသူ့ကို ဦးစားပီး အော်ပရေးယှင်း Operation အယင်ဆုံးလုပ်ရဖို့လဲလို့ ဒဏ်ရာရလူနာစာရင်း ကိုကြည့်နီရေ။

နိုင်ငံအသီးသီးက စစ်တပ်၊ရဲတိစွာ ယင်းအစိုးရစစ်တပ်၊ရဲတိကို ပုန်ကန်ရေအခါ ယင်းပုန်ကန်သူတိကို Operation ပယှောင် စစ်ဆင်ရီးတိလုပ်လို့ ဖြီယှင်းကတ်တေ။ မူးယစ်ဆီးဝါး၊ လူကုန်ကူးမှု၊ လူမှောင်ခို၊ ကျွဲနွားမှောင်ခို၊ တပြည်တရွာကခိုးဝင်နိုင်ငံသားတိကို နိုင်ငံတိအနီနန့်စစ်ဆင်ရီးကြီးပိုင် ဆင်နွှဲကတ်တေ။ ယ။ နိုင်ငံကြီးကေကြီးပိုင်၊ ငယ်ကေငယ်ရေအလျောက် ယင်းအလုပ်တိကို အကြီးအကျယ် (သို့)စိကေတဗွေ ကိုယ့်အတိုင်းအထွာနန့်ကိုယ်ဖြီယှင်းနီကတ်စွာကိုတွိရရေ။ အေချင့်တိက တရားဥပဒေမစိုးမိုးရေနိုင်ငံတိ၊ တရားမျှတမှုပျောက်ဆုံးနီရေနိုင်ငံတိမှာ လုပ်နီကတ်တေ Operation တိဖြစ်တေ။

နိုင်ငံတစ်နိုင်ငံနန့် တစ်နိုင်ငံဖြစ်တေစစ်ပွဲ၊ တစ်နိုင်ငံကတစ်နိုင်ငံကိုကျူးကျော်စစ်ပွဲတိအတွက် "Operation မယ်သယ်စွာ၊ မယ်ဝါစွာ"ဆိုပနာသုံးကတ်တေ။ တစ်ဦးတစ်ယောက်ကိုလုပ်ကြံသတ်ဖြတ်ဖို့အတွက် Operation ### ဆိုပနာသုံးကတ်တေ။ အေခေတ်မှာဆိုကေ နိုင်ငံတိစွာ စစ်ရီးမဟာမိတ်ဖွဲ့ပနာ ကြည်း၊ရီ၊လီ စစ်ဆင်ရီးတိကို ပြုလုပ်နီကတ်တေ။ ကောင်းမကြာခင်ကာလတုန်းက ပင်လယ်ပြင်စစ်ဆင်ရီးတိကို နိုင်ငံကြီးတိပူးပေါင်းလုပ်ဆောင်ခကတ်တေ။ အဂုလေ့လုပ်နီကတ်တေပိုင် နောက်မှာလည်း အေ Operation တိကိုလုပ်နီကတ်ဖို့သိမ့်ရာ။အင်ဒို-ပစိဖိတ်ဒေသမှာလုပ်တေ Cobra Gold ( Exercise/Operation) စွာအာဆီယံမှာ နာမည်ကြီးထင်ယှားရေ။ 

ကျနော်ရို့ အချေခါ Operation အော်ပရေးယှင်းဆိုရေစကားကို မြင်ဖူးကြားဖူးစွာက ဗီဒီယိုရုံတိရှိက ကြော်ငြာသင်ပုန်းတိမှာဖြစ်တေ။ အမှတ်ရနီစွာက Operation Delta Force ဆိုရေဇာတ်ကား။ အခြား Operation ပါရေ ဇာတ်ကားတိလေ့မကန်ဟိလီဖို့။ တိတိကျကျနာမည်တိကိုတော့ကောင်းမမှတ်မိလိုက်ဗျာယ်။ အမှတ်ရခါ Edit လုပ်ပနာပြန်ထည့်ပီးပ့မယ်။ 

တော်လှန်ရီးထဲကိုရောက်ခါ Google မှာရှာကြည့်လို့သိရစွာက အယင်@@ အေအေက ခိုင်ရာဇာကို လုပ်ကြံသတ်ဖြတ်လားခရေ Operation Leech အကြောင်း။ မျှော့စစ်ဆင်ရီး။ (Generation-Z တိသိထားသင့်ရေ သမိုင်းအမှန်တရားတစ်ခု)ရခိုင်ကိုကပ်ပါးကောင်အုပ်စုထဲကမျှော့နန့်ခိုင်းနှိုင်းထားစွာက မျှော့ဆိုစွာဇာလဲ၊ သူ့သဘာဝဇာလဲဆိုစွာကိုသိနိုင်ရေ။ မျှော့ဆိုစွာက များသားအားဖြင့်ရီပုပ်မှာမနီ၊ ရီသန့်မှာရာနီရေ။ လူအရှင်တိဘားကသွီးကိုစုပ်တေ။ သွီးစုပ်ကောင်။ သီလားရေလူတိဘားကစွာကိုတော့စုပ်/မစုပ်ယတိပြတ်မပြောတတ်။ အေနိအချိန်အခါ၏ဆီးကုထုံးမှာ မျှော့သွီးစုပ်ကုထုံးကို ဆီးပညာနယ်ပယ်က အဆစ်အမြစ်ကိုက်ခဲရေရောဂါ( osteoarthritis ) မှာ သုံးနီဗျာယ်။ (၁၉) ရာစုလောက်ကပင်သုံးခတေလို့လေ့ မှတ်သားဖူးရေ။

ကျနော်ပြောလိုရေ အော်ပရေးယှင်း နဲးနဲး( နည်းနည်း) အကြောင်းကို "နည်းနည်း"မပြောဘဲ "စကေ"ပြောပါမယ်။ 

ကျနော်ရို့တိရေ ကိုယ့်ရိုးရာ၊ ကိုယ့်ဘာသာစကား၊ ကိုယ့်ယဉ်ကျေးမှုကို ဖော်ထုတ်ပြသခွင့်မရစွာ အင်တန်ချေကြာပါဗျာယ်။ ဆယ်စုနှစ် ခြောက်ခု၊ ခုနစ်ခု( နှစ်ပေါင်း (၇၀)ကျော်) လောက်တောင်ကြာခဗျာယ်လို့ပြောကေမမှားလောက်။ဗမာလူမျိုးကြီးဝါဒကလွှမ်းမိုးထားခြင်း၊ ဗမာအစိုးရအဆက်ဆက်က သူရို့ စာပီ၊ ဘာသာစကား၊ ရိုးရာယဉ်ကျေးမှုကလွဲကေ အခြားလူတိစွာပျောက်အောင် မူဝါဒတစ်ခုပိုင်ချမှတ်ပနာ Operation အော်ပရေးယှင်းတစ်ခုပိုင် စနစ်တကျ အကွက်ချပနာ သင်းသတ်လုပ်ထားစွာကလည်း အခံနန့် မကျန်ရာ။ ကိုယ်ဂျဲးခံရရေဖက်က။ တစ်ခုလေ့မကျန်ရာဆိုရေပိုင်။

ကိုယ်ရို့ကိုယ်တိုင် ထိန်းသိမ်းခွင့်မရဟိခြင်းက စာပီ၊အနုပညာ၊ ဘာသာစကား၊ ယဉ်ကျေးမှု၊ သမိုင်းအမွီအနှစ်တိမှာ နီပူပြင်ထဲက ရီခဲချောင်းပယှောင် အရီပျော်ကျဆင်းပနာ အငွိပျံတက်ပျောက်လားဖို့ပြင်နီစွာ နန့်တူပြီးကေ အေပိုင်ဖြစ်ပျက်နီစွာအင်တန်ကြီး ကြာဗျာယ်။ ကိုယ်ကံကြမ္မာကိုယ်ဖန်တီးခွင့်မရခြင်း၊ ရက္ခိုင့်အချုပ်အချာအာဏာ ရက္ခိုင်ပြည်သူတိလက်ထဲမှာမဟိခြင်းက အခရာဖြစ်တေပိုင် ယင်း၏နောက်ဆက်တွဲ၊ ဘေးထွက် ဆိုးကျိုးတိအပြင် ကိုယ်ရို့တစ်ယောက်ချင်းစီ၏ ဂရုမပြု အလီးမထားမှုတိကြောင့်လေ့ပါပါရေ။

လူမျိုးတိုင်းစွာ ဘာသာစကား၊စာပီအမွီအနှစ်၊သမိုင်းတိကို မျိုးဆက်တူ (To) မျိုးဆက် လက်ဆင့်ကမ်းကတ်တေ။ ယင်းအထဲမှာ ဘာသာစကားကိုလက်ဆင့်ကမ်းရေအချိန်မှာလေ့ မူရင်း(ယင်း) ကောင်းမှ မိတ္တူကောင်းလိမ့်မယ် ဆိုရေအတိုင်း။ အဘာအမင်၊ အဖိုးအဘောင်ရို့၏ လီယူလီသိမ်း၊ အပြောအဆို၊ ဝေါဟာရသုံးစွဲပုံတိစွာ ကိုယ့်အိမ်ထဲမှာပြောဆိုရေအတိုင်း အနီးစပ်ဆုံးဟိနီရေ။ စီးမျောစီးဆင်းရေအတိုင်း။ရခိုင်လီသံ၊ ရခိုင်စကား၊ ရခိုင်စာ၊ ရခိုင်ရိုးရာ စွာ အေဂုပိုင်အစဉ်အတိုင်းဟိနီလီဖို့ယူဆရေ။

ရခိုင်လို့ခံယူဖို့ မွီးဖွားလာရေ အချေတစ်ယောက်စွာ ရခိုင်မြီမှာ မွီးဖွားခွင့်ရခကေ ရခိုင်လီသံနန့် ရခိုင်စကားကို သူ့ကိုမွီးပီးလိုက်တေ အမင်၊အဘာ၊ ယင်းအချေနန့်တူတူနီရေ ဆွီမျိုးတိ၏ပြောဆိုသံတိကြားမှာ ကြီးပြင်းလာရဖို့စွာက နရတိ။ ဆိုခါ ယင်းအချေတိ၏ အနာဂတ်စကားအပြောအဆိုစွာ သူ့အိမ်မှာ အများကြီးမူတည်ရေ။ ဒုတိယအနီနန့်က ယင်းအချေစွာ လေး၊ငါးနှစ်အရွယ်ရောက်ခါ ပညာသင်ယူဖို့လားရရေ ကျောင်းက ယင်းအချေကိုသင်ပီးရေ ဆရာ၊ဆရာမတိအပေါ်မှာ မူတည်ရေ။ အရွယ်ရောက်အသိပွင့်လာရေအချိန်မှာတော့ ယင်းကြီးလာရေအချေအပေါ်မှာမူတည်ရေ။

ရခိုင်မြီမှာမဟုတ်ဘဲ ရခိုင်မြီပြင်ပတစ်နီရာ၊ မျိုးဆွီတိအရိပ်နန့်ဝီးရာဒေသတိမှာ ရခိုင်လို့ခံယူဖို့ မွီးလာရေအချေတစ်ယောက်ဆိုကေတော့ အထက်ကပုံစံ၊ ပတ်ဝန်းကျင်တိစွာ ကွဲရေ။ အေပိုင်ပတ်ဝန်းကျင်ထဲက အချေတိ၏ အနာဂတ်စွာ အဖထက် အမိအပေါ်မှာပိုလို့မူတည်ဖို့လို့ယူဆရေ။ တရားသီပြောလို့မရဆိုစွာက ဥပမာတိကသက်သီဖြစ်တေ။

ဝမ်းရီးအတွက် စီးပွားရှာဖို့ရခိုင်မြီပြင်ပကိုထွက်လာကတ်တေ ရခိုင်မိဖနှစ်ပါးကမွီးလာရေအချေတိကို ကျနော်အများကြီးကြုံဖူးရေပိုင် ဆွီစပ်မျိုးစပ်အချေတိလေ့မကန်ဟိပါရေ။

ဥပမာ(၁) တချို့အချေတိက အိမ်မှာ ရခိုင်စကားပြောရေ။ ရခိုင်စာမသင်ရ။ သင်ဖို့ရခိုင်စာလေ့မဟိ။ အပြင်မှာ အများနားလည်ရေစကား(ဗမာစကား) ပြောရေ။ လိမ္မာပြီးအသိဟိရေမိဖတိက သတ်၊ဆို၊ဆုံးမပနာ ဘာသာစကားမပျောက်လားဖို့ထိန်းသိမ်းပီးကတ်တေ။ အမိအဖ ပညာတတ်/မတတ်နန့်မဆိုင်လို့ထင်ရေ။ အသိနန့်ရာဆိုင်ရေပိုင်တွိမိရေ။ အေပိုင်မိသားစုမျိုးတိကတော့ များသားဟိလီဖို့သိမ့်။ ယေကေလေ့ နှစ်နှစ်ဆယ်အတွင်းမှာတော့ အင်တန်ချေလျော့လားလီဖို့။

ဥပမာ(၂) တချို့အချေတိက အိမ်မှာ ရခိုင်စကားမပြော။ အမိအဖ ပြောရေ ရခိုင်စကားကိုတော့နည်းလည်ရေ။ ရခိုင်စကားနန့်ပြန်မပြော။ အမိအဖက ယင်းအတိုင်းထားပနာ ကြည့်ယင်း ယင်းအချေ ရခိုင်စကားမတတ်ဘဲ ကြီးလားခရေ။ သင်ပီးဖို့ လမ်းကြောင်းတည့်ပီးရဖို့ မသိရေအပြင် ဝမ်းစာရှာအလုပ်တိကြောင့် သင်ပီးဖို့အချိန်မရစွာလေ့ပါရေ။

ဥပမာ(၃) တချို့မိဖတိက ဉာဏ်ကောင်းလွန်းအားကြီးရေ။ အချေတိကိုရခိုင်စကားမပြောခိုင်းရေအပြင် ကိုယ်တိုင်လေ့မပြောလိုက်ဗျာယ်။ ကိုယ့်ရခိုင်စကားကို ပရံလူစကားနန့်အစားထိုးပလိုက်ဗျာယ်။ ဆိုခါ စားလီသကာ။

ဥပမာ(၄) တချို့အချေတိက ရခိုင်စကားကိုတော့ ပြောဖို့လေ့တတ်တေ။ နားလည်းလည်ရေ။ ယေကေလေ့ ပြန်မပြော။ ကိုယ်အားသန်ရေ ဘာသာစကား လျှာတွိရေဘာသာစကားနန့်ရာပြန်ပြောကတ်တေ။ 

အခြား ဥပမာတိလေ့ဟိပါသိမ့်ရေ။ နဲးနဲး ဖက်ကိုလားကတ်ပါမယ်။

အေနိ ရခိုင်တိပြောနီကတ်တေ စကားတိထဲမှာ Burmanization ၏ လွှမ်းမိုးဝါးမြိုမှုကြောင့် ကိုယ့်စွာကိုယ်သိသိနန့် ပဲ့ပါလားခရေစကားတိထဲက ဝေါဟာရအသုံးအနှုန်းတိကို စကေပြန်ထိန်းကတ်ပါမယ်။ ယင်းအထဲကမှ "နဲးနဲး" (သို့မဟုတ်) "နည်းနည်း"ဆိုရေ စာလုံး တစ်လုံးကို အရီး၊အပြောမှာ ပထမဆုံးပျောက်အောင်လုပ်ကတ်ပါမယ်။ လူတိမှတ်မိအောင် တမင် "နဲးနဲး" လို့ပေါင်းထားပါရေ။

ကျနော်ရို့ ပတ်ဝန်းကျင်မှာ အေ"နဲးနဲး"/"နည်းနည်း" ဆိုရေစကားကို နိတိုင်း ပြောဆိုနီကတ်တေ။ သတိမထားဘဲပြောဆိုနီကတ်တေလို့ပြောလို့ရရေ။ ကိုယ့်စွာကိုယ် မှားနီမှန်းလေ့မသိ၊ ဘေးပတ်ဝန်းကျင်ထဲမှာလေ့ သတိထားပြောဆိုရမှန်းမသိ၊ အစဟိလို့"မသိ" ခြင်းတိ ထုံလွှမ်းနီရေအခါ ကိုယ့်စကားစွာ ပရံလူစကား၏ ဝါးမြိုခြင်းကိုခံလိုက်ရရေ။ သတိမထားခြင်း၏ရလဒ်ဖြစ်တေ။

၂၀၂၀ ကိုဗစ်ကာလ u|a/@@ အတွင်းမှာ အေ "နည်းနည်း" အော်ပရေးယှင်းကိုစလုပ်တေ။ "အော်ပရေးယှင်း နဲးနဲး"။ နည်းနည်း၊ နည်းနည်းပါးပါး၊ အနည်းငယ်ဆိုရေစကားလုံးတိကို ရခိုင်ဝေါဟာရဖြစ်တေ" စိကေ" ၊"စကေ"၊"စကေတဗွေ"၊"စကေချေ"၊တစိချေ"၊"စိကေချေ"အစဟိသဖြင့် ပြောင်းသုံးဖို့လုပ်ကတ်တေ။ စာပီပညာသျှင်တိက "ဝေါဟာရတစ်လုံးအမှန်ဆုံး" ဖြစ်အောင်လုပ်ပီးကတ်ပါ။ 

တပ်တော်ထဲမှာ"အနည်းချေ" တစ်ခေါက်ပြောမိကေ၊ တစ်ခါသုံးမိကေ ပြစ်ဒဏ်အနီနန့် ဒိုင်းဆယ်ချိန်း။ ဆက်ခါဆက်ခါပြောမိကေ ဆတိုးပြစ်ဒဏ် နန့်, တပ်မှူးချုပ်ကနီ တပ်ခြံထဲမှာဟိရေ စာသင်သားအချေတိအဆုံး,မှားခကေအပြစ်ဒဏ်လုပ်ကတ်တေ ။ စစ်ဆင်ရီးကြီးပယှောင် လုပ်ကတ်ခတေ။ သုံးလေးလလောက်တော့ လုပ်လိုက်ရရေ။ ကျနော်ဆိုကေ ဒိုင်းထိုးပလိုက်ရလို့ ဝမ်းတောင်စိကေကပ်လားခရေ။

အေဂုဆိုကေ ယင်း "နည်းနည်း၊ အနည်းချေ"ဆိုရေ စကားလုံးတိနီရာမှာ ရခိုင်ဝေါဟာရစစ်စစ်တိ နီရာယူလားခဗျာယ်။ ယင်း နဲးနဲး(နည်းနည်း) စကားလုံးတောင်မဟုတ်၊ အခြား ဝါးမြိုထားရေအောက်သားစကားလုံးတိကိုရခိုင်ဝေါဟာရတိကိုအစားထိုးနီရေ။ ကိုယ်ရို့ပါးဇပ်ဖျားကပရံလူတိ၏စကားလုံးတိုင်းကို တစ်လုံးချင်းစီ ဖယ်ထုတ်နီကတ်ဗျာယ်။ ကျနော်ရို့ ကြားထဲမှာတော့ အင်တန်ချေ ခရီးပေါက်လားခဗျာယ်။ သတိထားပနာ ပြုပြင်ခြင်း၏ အကျိုးရလဒ်။

တပြိုင်နက်ထဲမှာ ကျနော်ရို့တိနန့်ထိတွိဆက်ဆံရေလူတိ၊ UL@ ကိုဝိုင်းရံပီးနီကတ်တေ ကိုယ့်အမျိုးတိကိုလေ့ အေ Operation နည်းနည်းအကြောင်းကိုပြောဖြစ်ပါရေ။ လိုက်နာနိုင်ရေလူစွာ (၂၀) ရာခိုင်နှုန်းလောက်ရာဟိစွာကို သတိထားမိရေ။ ဇာကြောင့်လဲဆိုစွာကိုဆန်းစစ်ရေအခါ u|@/@@ ထဲမှာက ပြောမှားကေ ပြစ်ဒဏ်ဆိုစွာပါရေ။ စည်းကမ်းကိုလိုက်နာရေ။ တာဝန်ယူမှုအပြည့်ဟိရေ။ အမိန့်နာခံမှုကောင်းရေ လို့ပြောကေရဖို့။ ကျနော်တောင် တခါတရီ မှားပါလို့ ဒိုင်းထိုးပြစ်ဒဏ်လုပ်နီရတုန်းသိမ့်။

မလိုက်နာရေလူတိ၊ မှားပြောမိနီရေလူတိ၊ မှားမှန်းသိကေလေ့ဆက်ပြောနီရေလူတိကိုဆန်းစစ်ကြည့်ရေအခါ အထက်ကအချက်တိမှာ စိကေအားနည်းနီရေ။ မပြောကေတစ်ခုလေ့မဖြစ် ၊ ပြစ်ဒဏ်မခတ် ဆိုစွာတိပါလီပါဖို့။ ကျနော်ရို့အစည်းအဝီးတိလုပ်ဖြစ်လို့ စကားပြောကတ်တေအခါ အေ"နည်းနည်း" ဆိုရေ စကားလုံး မပါအောင်သတိထားပြောကတ်တေ။ သတိထားပြောဖန်များခါ အလိတစ်ခုပိုင်ဖြစ်လို့ ပြောရေစကားတိထဲမှာမပါလိုက်ဗျာယ်။ အစည်းအဝီးထဲမှာ ကိုယ်ဇာနှစ်လုံးမှားပြောမိခလဲ ဆိုစွာကို ကိုယ့်စွာကိုယ်မှတ်ထားရေပိုင် တာလီမှတ်တစ်ယောက်လေ့ထားရေ။ နောက်ပိုင်း တာလီမှတ် မလိုလိုက်ဗျာယ်။ အပြောလေ့ မဟိလိုက်ဗျာယ်။

"အော်ပရေးယှင်း နဲးနဲး"။

ကျနော်ရို့ကြားမှာအောင်မြင်ပါရေ။ အမျိုးရို့လေ့ ကြိုးစားကြည့်ကတ်ပါ။ အမှားပြောခြင်း၊ အပြောမှားခြင်း ရေ ကိုယ့်ဘာသာစကားကို ကိုယ်တိုက်ဖျက်ဆီးနီခြင်းပင်ဖြစ်တေ။ အပြောသတိဟိဟိနန့် ကိုယ့် ဘာသာစကားကိုထိန်းသိမ်းကတ်ပါမယ်။ 

အာရက္ခတိုင်းပြည်ထဲကိုအဝင်မှာ အပြောမှား၊ အမှားပြောစွာတိကို ချန်ခပနာ လာခပါ။ နွီးထွီးစွာကြိုဆိုနီပါရေ။ မှားပြောမိကေတော့ ကိုယ့်စွာကိုယ် ကြိုက်ရေ ပြစ်ဒဏ်ပီးလီဖိ။

ရခိုင်လူမျိုးDr. ညိုထွန်းအောင်

၂၀၂၁ ခုနှစ်၊ မေလ(၉) ရက်၊ တနင်္ဂနွီနိ၊ နိခင်းသား နှစ်နာရီထိုးခါနီးရီးသားပြီးဆုံးပါရေ။

အော်ပရေးယှင်း နဲးနဲး

ရခိုင်လူမျိုး Dr. ညိုထွန်းအောင်