ဖေဖော်ဝါရီလ(၁၇) ရက်နေ့တွင် ယခင်နေ့များကတည်းက ရက်ဆက်တိုက်ပွဲများဖြစ်ပွားနေခဲ့သောပလက်ဝမြို့နယ်၊ မီးချောင်းတံတားအနီး မြန်မာ့တပ်မတော်၏လက်နက်ကြီးပစ်ကူပေးနေသောအမြောက်စခန်း(ဗျူဟာကုန်း)  ပတ်ဝန်းကျင် နှင့် ကျောက်တော်မြို့နယ်၊ ( ဝက်မကျ ရွာနှင့် တင်းမရွာအကြား) ပတ်ဝန်းကျင်များ၌တိုက်ပွဲများမှာဆက်လက်ဖြစ်ပွားနေခဲ့သည်။

ရန်သူ့ဗျူဟာကုန်းပတ်ဝန်းကျင်၌ရက်ဆက်တိုက်ပွဲဖြစ်ပွားနေခဲ့သည်မှာယနေ့ဆိုလျှင်(၁၂) ရက်မြောက် နေ့သို့ရောက်ရှိလာခဲ့ပြီဖြစ်သည်။ ရန်သူသည် ၎င်းဗျူဟာကုန်းသို့ ရိက္ခာ၊လက်နက်ခဲယမ်း၊ လူအင်အားများကိုဖြည့်တင်းပေးရန် ပလက်ဝ၊ ကျောက်တော် နှင့်အခြားနှစ်နေရာအပါအဝင်နေရာ(၄) နေရာမှ ကြိုးစားလျက်ရှိသည်။ ရန်သူ၏စစ်ကူစစ်ကြောင်းများအား ရက္ခိုင့်တပ်တော်မှ အကောင်းဆုံးဖြတ်တောက်တိုက်ခိုက်ထားနိုင်ဆဲပင်ဖြစ်သည်။

ဖေဖော်ဝါရီလ(၁၇) ရက်နေ့၌ နေရာသစ်(၂) နေရာ၌လည်းတိုက်ပွဲများရှိခဲ့ပြီး ယနေ့တိုက်ပွဲတွင်လည်း ရန်သူအချို့(အနည်းဆုံး-၅-ဦး) အားသုတ်သင်ရှင်းလင်းနိုင်ခဲ့သည်။ အသေးစိတ်အခြေအနေများနှင့်တိုက်ပွဲနောက်ဆက်တွဲများကိုသိရှိရပါက ထပ်မံတင်ပေးသွားပါမည်။

(၁) ရသေ့တောင်မြို့နယ်၊ ပြင်ချောင်းရွာတောင်ဖက်(၅၀၀) မီတာအကွာအဝေး၌နံနက်(၈) နာရီ(၂၄) မိနစ်တွင်လည်းကောင်း၊

(၂) ပလက်ဝမြို့နယ်၊ နှမ်းချောင်းရွာအရှေ့ဖက် (၃.၁) ကီလိုမီတာအကွာအဝေးနေ့လယ်(၃)နာရီခန့်တွင် လည်းကောင်းတိုက်ပွဲများရှိခဲ့သည်။ ညနေ(၄) နာရီ(၁၀) မိနစ်တွင် ရန်သူသည် ရဟတ်ယာဉ်(၂) စီးဖြင့် မိနစ်(၃၀) ခန့်လာရောက်ပစ်ခတ်တိုက်ခိုက်ခဲ့သည်။

သတင်းနှင့်ပြန်ကြားရေး
ရက္ခိုင့်တပ်တော်